سياسة الخصوصية

لمّا تحجز موعد، بنحفظ:

• اسمك ورقم جوالك — عشان المصلحة تعرف مين جاي وتقدر تتواصل معك بخصوص موعدك.
• تفاصيل الموعد — الخدمة والوقت ومين بيقدّمها، والملاحظة اللي بتكتبها بنفسك (اختيارية).
• أجوبتك على أسئلة الحجز إذا المصلحة سألت (مثل «سبب الزيارة»). كلها اختيارية، وعند عيادة ممكن تكون معلومات صحّية — فاكتب بس اللي بدك المصلحة تعرفه.
• سبب الإلغاء إذا كتبته وإنت بتلغي موعدك (اختياري).
• لغة الصفحة اللي حجزت منها، عشان نخاطبك فيها.
• بصمة مشفّرة من عنوان شبكتك (مش العنوان نفسه) — بنعدّ فيها المحاولات عشان نوقف الحجوزات الوهمية الكثيرة من نفس المكان، ومحاولات تخمين روابط المواعيد، وبتنمسح تلقائيًا بعد ما تخلص مدّتها.

ولمّا تفتح صفحة محل، حتى لو ما حجزت، بنعدّ أرقام مجمّعة عن صفحة المحل: كم مرّة انفتحت، وكم واحد وصل لكل خطوة وحجز، ومن أي نوع موقع إجا الزائر (مثل إنستغرام أو جوجل، مش الرابط نفسه). بتنحفظ كعدد لكل محل ولكل يوم، بدون اسمك ولا رقمك ولا عنوان شبكتك. وعشان ما حدا ينفخ هالأرقام، بنعدّ زيارات كل عنوان شبكة ببصمة مشفّرة مدّتها ساعة، وبتنمسح تلقائيًا بعد ما تخلص.

ونفس الشي على صفحات نمرتك نفسها (الصفحة الرئيسية وصفحة فتح الحساب): بنعدّ كم مرّة انفتحت، ومن أي نوع موقع إجا الزائر (مثل إنستغرام أو إعلان، مش الرابط نفسه)، كعدد لكل يوم، بدون اسم ولا رقم ولا عنوان شبكة.

ولمّا تفتح محل على نمرتك كصاحب محل، بنحفظ على محلّك من أي نوع موقع إجيت لنمرتك (كلمة وحدة زي «إنستغرام» أو «إعلان»، مش الرابط)، عشان نعرف شو بيجيب محلات.

وما بناخد منك حساب ولا كلمة سر ولا بيانات دفع — ما في دفع أونلاين في نمرتك أصلًا.

بياناتك بتنحفظ في قاعدة بيانات نمرتك — مستضافة عند Supabase، والموقع شغّال على Vercel — ومن المصالح ما بيشوفها إلا المصلحة اللي حجزت عندها. بتشوف رقمك في مواعيدها وبتقدر تتصل فيك أو تراسلك بخصوص موعدك.

والمصلحة ممكن تكتب عنك ملاحظة خاصّة بتشوفها هي وطاقمها بس (مثل «بحبّ الموعد الصبح»)، وممكن توقف الحجز لرقمك من صفحتها — وقتها بتحجز بالاتصال فيها مباشرة.

وإذا المصلحة مفعّلة إشعارات تطبيق نمرتك على جوالها، بيوصلها إشعار لمّا تحجز أو تلغي أو تغيّر موعدك، فيه اسمك والخدمة والوقت — بدون رقمك. والإشعار بيمرّ عبر خدمة إشعارات التطبيقات (Expo، ومنها Google أو Apple حسب جوال المحلّ) عشان يوصل.

وما بينشارك مع مصالح تانية: كل مصلحة بتشوف زبائنها هي بس، والعزل مفروض في قاعدة البيانات نفسها لا في الكود بس.

والأرقام المجمّعة عن صفحة المحل بيشوفها صاحب المحل عن محله، وإحنا كمنصّة بنشوف أرقام كل محل ومجموعها. وأرقام صفحات نمرتك نفسها، ومن وين إجا كل صاحب محل، بنشوفها إحنا بس.

والإعلانات والعروض؟ بموافقتك الصريحة وحدها.

في خانة في استمارة الحجز اسمها «ابعتولي عروض المحل وأخباره»، وهي غير مؤشَّرة. إذا أشّرتها، بنسجّل موافقتك بوقتها ومصدرها، وبتقدر المصلحة تبعتلك عروضها. وإذا ما أشّرتها، حجزك بيتمّ عادي ورقمك ما بينستعمل للعروض — الحجز ما بيعتمد عليها أبدًا.

وبتقدر تطلب سحب موافقتك من المصلحة أي وقت.

• ما بنبيع بياناتك ولا بنأجّرها لأي حدا.
• ما بنستعمل رقمك لإعلانات طرف ثالث.
• ما بنعمل ملفّ واحد عنك بيجمع حجوزاتك عند محلات مختلفة.
• ما بنستعمل كوكيز تتبّع ولا إعلانات. على جهازك بنحفظ بس اختيارك للوضع الداكن وإخفاء دعوة التطبيق، ومن وين إجت زيارتك للمحل أو لصفحات نمرتك وأي خطوات وصلتها لحدّ ما تسكّر التبويب، والكوكيز بس لتسجيل دخول أصحاب المصالح.

بيانات الموعد بتضلّ في سجلّ المصلحة عندنا. ورابط إدارة موعدك بيضلّ شغّال لحدّ يومين بعد موعدك، وإذا انتقل الموعد بينتقل معه، وبعدها ما بيفتح.

وكل ليلة بناخد نسخة احتياطية مشفّرة من قاعدة البيانات عشان ما تضيع المواعيد إذا صار عطل، بتنحفظ على جهاز عندنا مقفولة بمفتاح ما بيفتحه غيرنا وبتنمحى لحالها بعد 7 أيام — يعني اللي بينحذف من عندنا ممكن يضلّ في هالنسخ لحدّ 7 أيام، وبعدها بيروح منها كمان.

هاد التطبيق مش للزبون — هو أداة شغل لصاحب المحل ومين بشتغل عنده، بيشوفوا فيه مواعيد يومهم ويأكّدوها. واللي بناخده من مستعمله:

• إيميله وكلمة سره عشان يدخل على حساب محلّه — نفس دخول الموقع، وكلمة السر بتنحفظ عند مزوّد الدخول (Supabase) مش عندنا.
• رمز إشعار الجهاز ونوع نظامه (أندرويد أو iOS) — رمز بيعطيه النظام للتطبيق، عشان يوصله إشعار لمّا يحجز زبون أو يلغي. ومعه وقت آخر استعمال، عشان نعرف الجهاز الشغّال من المهجور.
• اسمه وصورته إذا ضافهم بنفسه من «إعدادات الحساب» — الاثنين اختياريين. بيشوفهم هو بس، مش الزبائن ولا باقي الطاقم، وبينحذفوا مع حسابه.
• موافقته على الشروط — لمّا ينشئ محلّه أو يوافق من لوحته، بنسجّل نسخة الشروط اللي وافق عليها ووقت موافقته، عشان نعرف على أي نصّ وافق. وبتنحذف مع حسابه.

وبس. ما بناخد موقعه الجغرافي ولا دفتر أرقامه، والتطبيق ما بيفتح معرض صوره (الصورة بس اللي بيختارها هو لحسابه)، ولا بنتتبّعه بين التطبيقات، ولا في إعلانات ولا تحليلات طرف ثالث جوّا التطبيق.

ولمّا يسجّل خروج، بنبطّل رمز جهازه فورًا فما بيوصله إشعار بعدها. ولو حدا تاني دخل على نفس الجهاز (جهاز المحل المشترك)، الرمز بيصير لآخر واحد دخل — مش بينسخ، فما بيوصل إشعار المحل لواحد طلع منه.

وبيانات الزبائن اللي بتظهر بالتطبيق (الاسم والرقم والملاحظة) هي بيانات المحل اللي حجز عنده الزبون، وبتنطبق عليها كل القواعد فوق — نمرتك بتخزّنها له وبتوصّلها لجهازه، ولا بتخرج لمحل تاني.

بتقدر تطلب من المصلحة تشوف بياناتك عندها، أو تصحّحها، أو تحذفها. ولو ما وصلت لحلّ معهم، تواصل معنا على contact@nomretak.com.

ولو عندك حساب نمرتك (صاحب محلّ أو من طاقمه) وبدّك تحذفه هو وبياناته، الطريق كاملة هون: حذف الحساب وبياناته.